Dagur 29

Hugleiðsluæfing dagsins - Hvað er ég að einblína á

Það eru örfáir dagar eftir af hugleiðslupakkanum. Ef þú hefur náð toppnum á fjallinu og ert að finna ávinning hennar skaltu njóta þess. Ef ekki skaltu sýna smá þrautseigju og halda áfram. Ef það koma upp erfiðleikar ekki hætta að hugleiða, sýndu seiglu – haltu áfram. Á endanum munt þú alltaf græða á því að hugleiða en það getur tekið mislangan tíma að sjá það.

Í dag ætlar þú að spyrja sjálfan þig sömu spurningu og í gær með því markmiði að vera meira meðvituð/aður um sjálfan þig og að þú ert við stjórnina en ekki að þú farir í gegnum lífið án þess að taka eftir því hvað er að hafa áhrif. Spurningin er “Hvað er ég að einblína á í dag, hvaða áhrif er það að hafa á mig, get ég séð það með öðrum hætti“, leyfðu þér að eiga þessar samræður. Þú ætlar að æfa þig í að sjá það „slæma“ með öðrum hætti og finna betra viðhorf og þú ætlar að styrkja það sem þú ert að gera vel og einblína á það meðvitað.

*Það gæti verið gott að vera með blað og skriffæri hjá þér ef þú skyldir komast að einhverju í hugleiðslunni sem þú vilt geta minnt þig á. Ef þú ert ekki með blað og skriffæri gætir þú skrifað punkta í símanum.

Back to blog