Dagur 3

Hugleiðsluæfing dagsins - Hvernig líður mér

Núna ertu rétt byrjuð/aður að klífa upp fjallið þitt, kannski lendir þú strax á bröttum kafla og getur verið að þér líði eins og hugleiðslan sé ekki að gera neitt fyrir þig, þú nærð ekki að slaka, hugsanirnar eru út um allt, þér finnst þetta tilgangslaust, kjánalegt eða eins og þetta hafi bara engin áhrif á þig. Ef þér líður svona líttu svo á að þú sért að klífa upp brattan hjalla í fjallinu þínu. Ef þér líður vel eða finnur lítil áhrif af hugleiðslunni getur þú litið svo á að fjallið þitt byrji í þægilegum halla.

Í dag ætlar þú að spyrja þig aftur sömu spurningu og í gær með því markmiði að þú náir að þekkja betur inn á þig, þína líðan og náir að styrkja innsæið þitt þannig að þú getir treyst betur á þig. Þú ætlar að styrkja það sem er gott og bæta það sem má bæta. Spurningin í hugleiðslunni er „hvernig líður mér, afhverju og hvað get ég gert í því“. Ef þér líður vel reyndu að komast að því af hverju þér líður vel og hvað þú getur gert til að halda því áfram. Ef þér líður illa reyndu að komast að því af hverju þér líður illa og hvað þú getur gert í stöðunni. Ef þú veist ekki hvernig þér líður skaltu kanna af hverju og hvað þú getur gert í því. Þessi æfing er einmitt ætluð til þess að læra betur inn á sjálfan þig.

*Það gæti verið gott að vera með blað og skriffæri hjá þér ef þú skyldir komast að einhverju í hugleiðslunni sem þú vilt geta minnt þig á. Ef þú ert ekki með blað og skriffæri gætir þú skrifað punkta í símanum.

Back to blog