Dagur 4

Hugleiðsluæfing dagsins - Hvernig líður mér

Þú ert komin/nn nokkrum skrefum lengra upp fjallið en í gær. Það gæti verið að þú sért strax móð/ur því þú hefur ekki áður labbað upp fjall (hugleitt) eða langt síðan síðast. Haltu áfram, það er enginn góður í neinu í fyrstu. Að vera lélegur í einhverju er byrjunin á því að vera góður í einhverju. Ef þú finnur að hugleiðslan er að gera þér gott getur þú litið svo á að þú hafir eitthvað þol í fjallgöngur (hugleiðslu).

Í dag ætlar þú að spyrja þig aftur sömu spurningu og í gær með því markmiði að þú náir að þekkja betur inn á þig, þína líðan og náir að styrkja innsæið þitt þannig að þú getir treyst betur á þig. Þú ætlar að styrkja það sem er gott og bæta það sem má bæta. Spurningin í hugleiðslu er „hvernig líður mér, afhverju og hvað get ég gert í því“. Ef þér líður vel reyndu að komast að því af hverju þér líður vel og hvað þú getur gert til að halda því áfram. Ef þér líður illa reyndu að komast að því af hverju þér líður illa og hvað þú getur gert í stöðunni. Ef þú veist ekki hvernig þér líður skaltu kanna af hverju og hvað þú getur gert í því. Þessi æfing er einmitt ætluð til þess að læra betur inn á sjálfan þig.

*Það gæti verið gott að vera með blað og skriffæri hjá þér ef þú skyldir komast að einhverju í hugleiðslunni sem þú vilt geta minnt þig á. Ef þú ert ekki með blað og skriffæri gætir þú skrifað punkta í símanum.

Back to blog