Líkamsbeiting í hlaupum með kerru

Líkamsbeitingin er mismunandi eftir því hvort þú gengur, skokkar, hleypur eða sprettur. Hafðu þessa lýsingu í huga eftir hraða. 

Ganga

Skokka, hlaupa eða spretta  

Myndbönd

Ganga

Í göngu ættir þú að geta haft báðar hendur á kerrunni og ef þú ert með hlaupakerru að hafa dekkið að framan ólæst (þannig að það er hreyfanlegt). Passaðu að halda öxlum niður frá eyrum og að hugsa að einhver sé að draga þig upp frá höfði með spotta (þannig nærðu að rétta vel úr þér). Líkaminn ætti að vera nálægt kerrunni þannig að hendur eru í 90 gráðum (eru aðeins bognari þegar þú labbar upp brekku og aðeins beinni þegar þú labbar niður brekku). Lentu með hæl í jörðu þannig að þú stígur upp frá tám. Hugsaðu að þú sért létt á fæti og virkjaðu rassvöðva með hverju skrefi (getur hugsað að þú spennir rassvöðvana í hvert skipti sem þú lyftir þeim fæti frá jörðu). Vertu síðan slök í kvið og baki. Andaðu djúpt. Taktu nokkur skref í hverri öndun þannig að þú nýtir lungun og finndu þinn takt þannig að þú pælir ekki of mikið í því.

Skokk, hlaup, sprettir

Ef þú ætlar að skokka, hlaupa og/eða spretta með kerru er mikilvægt að þú eigir kerru sem er ætluð til þess. Barnið verður að vera spennt og dekkið sem er að framan verður að vera læst til þess að tryggja öryggi barnsins. Þegar þú eykur hraðann er best að halda með annari hendi í kerruna og vera með hina lausa þannig að hún sveiflist með líkamanum þegar þú skokkar/hleypur/sprettir. Vertu þó alltaf með báðar hendur á kerrunni þegar þú þarft að taka einhverjar beygjur, ferð niður brekkur, yfir götur eða í öðrum aðstæðum sem gætu skapað hættu. Hendur eru í 90 gráðum og líkaminn er nálægt kerrunni (hendur eru aðeins bognari þegar þú ferð upp brekku og aðeins beinni þegar þú ferð niður brekku). Skiptu síðan reglulega um hendi þannig að þú fáir hreyfingu á brjóstbakið á einhverjum tímapunkti (efra bakinu). Þegar hlaupið er með kerru er aldrei hægt að ná jöfnum hraða og án kerrunar. Kviðvöðvar rétt spennast og slakna með hverju skrefi (hugsaðu að þú sert að virkja þá frekar en að reyna á þá). Lentu á fætinum rétt undir tábergi og á táberginu. Andaðu djúpt. Taktu nokkur skref í hverri öndun þannig að þú nýtir lungun og finndu þinn takt þannig að þú pælir ekki of mikið í því.

Back to blog